Azay Quliyev DGTYB-nin 20 illik yubileyini təbrik edib

Azərbaycan Prezidenti yanında Qeyri-hökumət Təşkilatlarına Dövlət Dəstəyi Şurasının sədri, Millət vəkili dr.Azay Quliyev DGTYB-nin 20 illik yubileyi münasibəti ilə məktub göndərib.

"Dünya Gənc Türk Yazarlar Birliyi Məsləhət
Şurasının başqanı Əkbər Qoşalıya

Hörmətli Əkbər müəllim!

Dünya Gənc Türk Yazarlar Birliyinin 20 illik yubileyi münasibətilə Sizi və kollektivinizi səmimi qəlbdən təbrik edirəm!

Dünya Gənc Türk Yazarlar Birliyi müstəqil Azərbaycanın təcrübəli və öncül qeyri-hökumət təşkilatlarından biridir. İctimai sektorun formalaşmağa başladığı ilk vaxtlarından fəaliyyət göstərən təşkilatınız Azərbaycanın dövlətçilik maraqlarını həmişə yüksək tutub.

Dünya Gənc Türk Yazarlar Birliyinin təşkilatçılığıyla türk dövlətlərini təmsil edən gənc yazarların mütəmadi olaraq Azərbaycana dəvət edilməsi, onlar arasında ədəbi əlaqələrin möhkəmləndirilməsi, eləcə də onlara ölkəmizin dövlət müstəqilliyi dövründə əldə etdiyi nailiyyətlərin bilavasitə tanıdılması mühüm ictimai-siyasi əhəmiyyət kəsb edir. Təşkilatınız həyata keçirdiyi layihələr vasitəsilə türk dövlətlərinin ümumi mədəniyyətinin inkişafı üçün müxtəlif türk dillərinin qarşılığını əks etdirən poeziya almanaxları, lüğətlər və başqa ədəbi nümunələr çap edərək onların bütün türk coğrafiyasında geniş yayımına nail olur.
Beynəlxalq miqyasda ictimai sektorun qazandığı təcrübənin Azərbaycana gətirilməsində, Azərbaycanla bağlı həqiqətlərin dünyaya çatdırılmasında Birliyinizin dəyərli xidmətləri var. Müxtəlif ölkələrdəki təmsilçiləriniz ümumtürk mədəniyyətinin təbliğatçıları kimi Azərbaycanın da milli maraqlarını müdafiə edir, xalqımıza, mədəniyyətimizə və tariximizə qarşı haqsız iddialara qarşı mübarizə aparırlar.

Hörmətli Əkbər müəllim!

Dünya Gənc Türk Yazarlar Birliyinin ötən 20 il ərzində gördüyü işlər ölkəmizin QHT sektoru üçün bir örnəkdir. Bu nailiyyətlərinizin davamlı və daha geniş əhatəli olacağına əminliyimi bildirir, bir daha Sizi və Birliyinizin üzvlərini 20 illik yubileyiniz münasibətilə təbrik edir, hər birinizə can sağlığı, xoşbəxtlik arzulayıram.

Hörmətlə,
Sədr: Azay Quliyev"