"Hər gün Xocalıdır" - Balayar Sadiq ... Atəş.az

XOCALI

(Düşmən mühasirəsində yeniyetmə qızı əsir düşməsin deyə onu güllələyən atanın ağısı)

İlahi, ver əllərini,
Bu son ərzimi basdırım.
Üz-gözü namus ətirli,
Körpə arzumu basdırım.

Göz yaşına qapım bağlı,
Qeyrət başdan qapıb ağlı.
Bu üzü əcəl duvaqlı,
Şirin nazımı basdırım.

Qızım, dur, bu dərdə isin,
Bu dərddi ləpirin, izin.
Güldürdüm qeyrətin üzün,
İndi üzümü basdırım.

Daşlar daşlığından qaçır,
Başlar başlığından qaçır.
Haqqın sözü qançır-qançır,
Yer yox sözümü basdırım.

Heyrətdən susub fələklər,
Qıvrılır tənhalar, təklər.
Endirsin yerə mələklər,
Alın yazımı basdırım.

1994