Mədəniyyət Nazirliyində 441 milyon büdcə pulu necə talan edilib - faktlar

Nazir Əbülfəs Qarayev susur, izlər isə məsuliyyəti həm də onun üzərinə aparır...
Dövlət Təhlükəsizliyi Xidmətinin (DTX) Mədəniyyət Nazirliyində keçirdiyi əməliyyatdan sonra bütün diqqət nazir Əbülfəs Qarayevə yönəlib. Nazir isə istefa vermir və susur. Sanki baş verənlərin onunla heç bir əlaqəsi yoxdur. Ortalıqda olan videolar, şahid ifadələri onu deməyə əsas verir ki, Ə.Qarayev nazirlikdəki korrupsiya bataqlığının içərisində olub.

Ortada olan məlumatlardan isə belə aydın olur ki, DTX əməliyyat keçirdiyi anlarda Mədəniyyət Nazirliyinin mühasibatlığında 2 sifariş üzrə büdcədən yarım milyon manatdan artıq pulun bölgüsü aparılırmış.

Bu haqda jurnalist Rüstəm Əbülfətoğlu maraqlı araşdırma aparıb. Onun yazdığına görə, nazirlik qərara alıb ki, təşkilatda 1 ildən çox istifadə edilən kompüter proqramlarına (yalnız) texniki dəstək üçün 269 min 999 manat xərclənib (ilin sonuna 7 ay qalır bu hesabla 1 aya 38570,00 manat). Yerdə qalan vəsait isə “Birinci İslam Ölkələri Xalq Çalğı Alətləri və III Beynəlxalq Aşıq Festivallarının və Elmi simpoziumun təşkili”nə sərf olunub. DTX-nın əməliyyatı mühasibatlıqdan hələlik yan keçdiyi üçün proses birtəhər başa çatdırılıb.

Bununla belə, indi nazirlikdə bəzi vəzifəlilər daha çox narahat görünürlər. Deyilənə görə, buna səbəb ölkədə karantin rejimi elan olunan gündən bu yana, yəni 14 mart 2020-ci ildən nazirliyin idarə və xidmətləri vasitəsilə hər birinin dəyəri 50 min manatdan yuxarı olan 18 tender və dəyəri 50 min manatdan aşağı olan 12 kotirovka üsulu ilə keçirilmiş alqı-satqı əməliyyatlarının şəffaflığı barədə də istintaqçıların məlumatlara malik olmasıdır. Son 2 ayda nazirliyin qurumları “istehlak yönümlü müxtəlif xidmətlər”dən başlayaraq, “müxtəlif vasitələrlə muzeylərin fəaliyyətinin inkişafı işləri”, o cümlədən “təntənəli yubiley tədbirləri, ədəbi müsabiqələr, festivalların mükafatlandırma mərasimləri, poeziya günləri və s. təşkili” də daxil, 32 əməliyyat üzrə bu günə qədər büdcədən 5 milyon 970 min manat xərcləyib. Bu məbləğə işçilərin əmək haqları və s. bu tip heç bir ödəniş daxil deyil! Maraqlıdır ki, bütün bu alqı-satqı və xərclər bir daha təkrar edirəm ölkə rəsmi karantində olduğu zaman son 2 ayda rəsmiləşdirilib.\

Bu ağır günlərdə heç bir müəssisənin işləmədiyi müddətdə nazirliyin muzey və fond binalarındakı kondisioner, ventilyasiya, isitmə, isti və soyuq su təchizatı sistemlərinə texniki servisin göstərilməsi üzrə xərcləri də xüsusi diqqət çəkir. Bu məqsədlə dövlət büdcəsidən 297 min 931 manat, teatr binalarında isə eyni xidmət üçün 298 min 589 manat vəsait xərclənib. Başqa sözlə, muzey, fond və teatrlardakı havalandırma sisteminə sadəcə texniki servis xidməti (heç bir avadanlıq alınmadan) büdcəyə ümumilikdə 578 min 520 manata başa gəlib. Azərbaycan Respublikasının 2020-ci il dövlət büdcəsi haqqında qanuna əsasən “Mədəniyyət, incəsənət, informasiya, bədən tərbiyəsi, gənclər siyasəti və bu qəbildən olan digər fəaliyyət” üçün 441 milyon 921 min 500 manat ayrılıb.

Bu vəsaitin 178 milyon 714 min 885 manatı mədəniyyət və incəsənət sahəsində fəaliyyət, 156 milyon 180 min 776 manatı isə mədəniyyət, incəsənət, informasiya, bədən tərbiyəsi, gənclər siyasəti sahəsinə aid olan digər müəssisə və tədbirlər üzrə xərclənə bilər. Yəni ümumilikdə 334 milyon 895 min 661 manat vəasait Mədəniyyət Nazirliyinin ixtiyarina verilib. Təşkilat bu vəsaiti İstanbuldakı Topqapı saray kompleksində “Azərbaycan evi”nə dair bədii-tərtibat işlərindən başlayaraq regional mərkəzlərindəki katriclərin doldurulması xidmətinə qədər ilin sonuna kimi xərcləyə bilər. Bu da maraqlıdır ki, rəsmi statistik məlumatlara əsasən, Mədəniyyət Nazirliyi şəhər və regional idarələri də daxil təkcə 2019-cu ildə dəyəri 3 milyon ABŞ dollarının manat ekvivalentindən çox olan 73 alqı-satqı əməliyyatı həyata keçirib. Və bunlardan 34-nü regional mədəniyyət idarələri vasitəsilə reallaşdırıblar....

Təkcə Biləsuvar Regional Mədəniyyət İdarəsi yalnız dəftərxana xərcləri üzrə ötən il 391795.98 manat vəsait xərcləyib.

Yazılanlardan Əbülfəs Qarayevin xəbərsiz olması isə sadəcə inandırıcı görünmür. Nazirin avtobioqrafiyası onun bu məsələlərdən hali olmasını ortaya qoyur.

Kimdir Əbülfəs Qarayev?

Əbülfəs Qarayev tanınmış cərrah Mürsəl Qarayevin ailəsində anadan olub. 13 noyabr 1956-cı ildə Bakı şəhərində doğulan Əbülfəs Qarayev 1963-cü ildə Bakı şəhəri 23 nömrəli tam orta məktəbə gedib və 1973-cü ildə həmin məktəbi bitirib. 1973-1978-ci illərdə Azərbaycan Pedaqoji Xarici Dillər İnstitutunda təhsil alıb. 1978-ci ildə Saatlı rayonunda Məşədi Əzizbəyov adına orta məktəbdə ingilis dili müəllimi işləyib. 1980-1985-ci illərdə Azərbaycan LKGİMK-nın təşkilat şöbəsinin təlimatçısı, bölmə müdiri, 1985-1989-cu illərdə Azərbaycan KP Nərimanov rayon komitəsində təşkilat şöbəsinin təlimatçısı, təbliğat şöbəsinin müdiri vəzifələrində çalışıb. 1989-1992-ci illərdə - Sov. İKP MK yanında İctimai Elmlər Akademiyasının aspiranturasında təhsil alıb (1992-ci ilin yanvarında “1918-1930-cu illərdə - Azərbaycan mühacirətinin mədəniyyətşünaslıq aspektləri” mövzusunda dissertasiya müdafiə edərək “Fəlsəfə elmləri namizədi” elmi dərəcəsi alıb.

1992-ci ildə Rusiya İdarəetmə Akademiyası nəzdində menecerlik və marketinq kurslarında, 1992-1993-cü illərdə Bakı Politologiya və Sosial İdarəetmə İnstitutunun mədəniyyatşunaslıq kafedrasında baş müəllim olub. 1993-1994-cü illərdə “İmproteks Kommers” kiçik müəssisəsində müdir vəzifəsində çalışıb.

1994-2001-ci illərdə gənclər və idman naziri, 2001-2006-cı illərdə gənclər, idman və turizm naziri, 2006-2018-ci illərdə mədəniyyət və turizm naziri vəzifələrində çalışıb. 11 noyabr 2016-cı ildə “Şöhrət” ordeni alıb. 2018-ci ildə mədəniyyət naziri təyin edilib. Ailəlidir, bir övladı var.

Belə bir həyat təcrübəsi olan, müəllimlikdən biznesə adlamış, sonradan nazir postuna qədər qalxan, 26 il bu postda qərarlaşan Əbülfəs Qarayevin əlinin altında böyük korrupsiya bataqlığı onun nəzarətindən kənar yarana bilərdi?

Elşən MƏMMƏDƏLİYEV,
“Yeni Müsavat”