Qabil Ədalət - Adam insanlıqdan çıxarmış, Allah... Atəş.az

Adam insanlıqdan çıxarmış, Allah
(pul, vəzifə görüb insanlığını itirən adamlara)

Vəzifə başına keçsədə dünən,
Artıq əlaqə yox, bu gün heç kimnən.
Bu gün göynən gedir, dünən sürünən,
Adam insanlıqdan çıxarmış, Allah...

Qudurub özünü padişah sayır,
Manatın yüzdüyün paçkaynan sayır.
Tələb edir məni: hər kəsdən ayır,
Adam insanlıqdan çıxarmış, Allah...

Allah da düşməyir, indi yadına,
Yazıq gedir, var-dövlətin badına.
Yalandan and içir haqqın adına,
Adam insanlıqdan çıxarmış, Allah...

Bir kəsə acımaz, bir kəsə yanmaz,
Millətin halını anlamaz, qanmaz.
Rüşvətə vaxt qoyur, hətta utanmaz,
Adam insanlıqdan çıxarmış, Allah...

Demək, ot saralıb saman olurmuş,
İnsanı dəyişən zaman olurmuş.
Acın qudurmağı yaman olurmuş,
Adam insanlıqdan çıxarmış, Allah...