Fake profillərin sonu çatdı

hemlemedia.az TTV.az-a istinadən bildirir ki, Facebook sosial şəbəkəsində saxta profil açanlara qarşı mübarizənin miqyası genişləndirib. Bunu facebook-un qurucusu Mark Zukerberq elan edib. O, bildirib ki, bu sosial platformadakı bütün saxta profillər bağlanacaq. Mütəxəssislərin sözlərinə görə, Azərbaycanda da yalan adlarla profillərin açılması hallarına rast gəlinir, əgər facebook ikinci dəfə anti-fake proqramını işə salsa bu cür profilərin əksəriyyəti ləğv ediləcək.

Facebookun daxilində saxta profili müəyyən edib, silə bilən sistem yaradılıb. Bunun hesabına ilk mərhələdə minlərlə profil silinib. İkinci dəfə belə bir addımın atılması isə əksər fake profillərin bağlanmasına imkan verəcək. Mütəxəssislər deyirlər ki, son vaxtlar saxta profil istifadəçilərinin sayında azalma var. Buna baxmayaraq, yenə də sosial şəbəkə istifadəçiləri diqqətli olmalıdırlar. Bir müddət əvvəl Azərbaycanda sosial şəbəkələrdə saxta profillərlə başqasını təhqir edənlərin cinayət məsuliyyətinə cəlb edilməsi ilə bağlı məcəlləyə dəyişikliklər təklif olunub. Mütəxəssislər hesab edirlər ki, layihə qəbul edilərsə, onun tətbiqi üçün də texniki mexanizmin yaradılması mütləqdir.