Uzunömürlülüyün sirri: Ürək sağlamlığı üçün həftədə optimal yumurta sayı açıqlandı

Müntəzəm yumurta istehlakı ürək-damar xəstəliklərindən ölüm riskini əhəmiyyətli dərəcədə azalda bilər.

Bununla bağlı Monaş Universitetinin (Avstraliya) alimləri tərəfindən aparılan tədqiqatın nəticələri "Nutrients" nəşrində dərc edilib.

Tədqiqatda anamnezində ciddi ürək-damar xəstəlikləri olmayan 70 yaşdan yuxarı 8 756 könüllü iştirak edib. Alimlər sınaq iştirakçılarının qidalanma məlumatlarını təhlil edərək, xüsusi diqqəti yumurta istehlakına yönəldiblər. Nəticələr göstərib ki, həftədə 1-6 yumurta yeyən insanlarda ürək xəstəliklərindən ölüm riski 29 faiz azalıb.

Həmçinin, yumurta istehlakının bu səviyyəsində olan könüllülərdə ümumi ölüm nisbəti, yumurtanı tamamilə qidalanmadan çıxaran və ya ayda bir-iki dəfə məhdudlaşdıranlarla müqayisədə 17 faiz aşağı olub.

Alimlərin sözlərinə görə, yumurtalar haqlı olaraq faydalı məhsul hesab edilir. 100 qram yumurtada təxminən 13 qram zülal var ki, bu da heyvan və ya bitki mənşəli digər zülallardan daha effektiv mənimsənilir. Yumurtalarda əvəzolunmaz amin turşularının tam spektri, həmçinin vitaminlər və minerallar - fol turşusu, A, D, E, B12 vitaminləri, biotin, selen, kalsium və fosfor mövcuddur.

Lakin mütəxəssislər qeyd ediblər ki, yumurta istehlakı ürək-damar sisteminin sağlamlığını yaxşılaşdırmağın yeganə yolu deyil. Riskləri minimuma endirmək üçün qidalanmaya bitki mənşəli qidaları daxil etmək və fiziki aktivliyə diqqət yetirmək də lazımdır.