Niyə bəzən saatlar göz qırpımında keçir, bəzən isə dəqiqələr əbədi görünür? Alimlərdən İZAH

Hər birimiz zamanın qəribə oyunları ilə üzləşmişik. Bəzən saatlar gözə görünmədən keçir, bəzən isə dəqiqələr əbədi görünür. Bu fenomen əsrlərdir insanları düşündürür.

Perm Politexnik Universitetinin tədqiqatçıları bir sıra eksperimentlər apararaq bu suala cavab tapmağa çalışıblar.

Tədqiqatın nəticələri göstərir ki, sevincli və pozitiv hadisələr zamanın axışını sürətləndirir, monoton və səbr tələb edən vəziyyətlər isə onu yavaşladır. Alimlərin sözlərinə görə, bu ona görə baş verir ki, biz zehnimizdə zamanı intervallara bölürük və bununla da onun qavranılmasını uzadırıq.

"Fenomeni beyin yarımkürələrində oyanma və tormozlanma ritmikası ilə izah etmək olar. Oyanma proseslərinin üstünlük təşkil etməsi maddələr mübadiləsini sürətləndirir, bu da subyektiv qavrayışın sürətlənməsinə və ya yavaşlamasına gətirib çıxarır", - deyə tədqiqatçılar bildiriblər.

Bundan əlavə, alimlər psixoloq Robert Ornşteynin nəzəriyyəsinə diqqət yetiriblər. Bu nəzəriyyəyə görə insan nə qədər çox məlumat qəbul edirsə, zaman intervalı ona bir o qədər uzun görünür.

Tədqiqatçılar həmçinin qeyd ediblər ki, zamanın subyektiv "kompressiyası" "axın vəziyyəti" adlanan işə dərindən cəlb olunma halı ilə bağlıdır.

"Axın vəziyyəti"ndən çıxdıqda insana elə gəlir ki, zaman ikiqat sürətlə gedib", - deyə onlar bildiriblər.

Beləliklə, zamanın axışı bizim emosional vəziyyətimizdən, gördüyümüz işin xarakterindən və aldığımız məlumatın miqdarından asılıdır.