Səhər acqarına bir stəkan su içmək faydalıdırmı?

Səhər acqarına bir stəkan su içməyin həzmi yaxşılaşdıra biləcəyi fikri çox populyardır. Lakin əslində bu, həzmə heç bir təsir göstərmir, hətta onu çətinləşdirə bilər.

Bu barədə rusiyalı qastroenteroloq Aliya Useyeva Gazeta.ru-ya danışıb.

Səhər içilən bir stəkan suyun həzm proseslərini aktivləşdirmək üçün katalizator rolunu oynadığı fikri orqanizmin təmizlənməsinin qədim ənənələrindən qaynaqlanır.

"Həzm funksiyası sadəcə maye qəbulu ilə məhdudlaşmır. O, qidanın mədəyə daxil olması ilə başlayır ki, bu da ağız suyunun və həzm fermentlərinin ifrazına səbəb olur. Əslində, bir stəkan su özlüyündə bu prosesə əhəmiyyətli təsir göstərə bilməz. Şəxsən mən müşahidə etmişəm ki, bu tövsiyəyə əməl etməyə çalışan bəzi xəstələr bəzən qarında narahatlıq və ya ağırlıq hiss edirlər. Səhər yeməyindən əvvəl həddindən artıq su içmək, hətta həzmi çətinləşdirə bilər", - deyə həkim bildirib.

Onun sözlərinə görə, həzmi asanlaşdırmaq üçün mayeni yeməkdən əvvəl deyil, yemək zamanı içmək lazımdır.

"Hər insanın öz xüsusiyyətləri var və bunu nəzərə almaq vacibdir. Məsələn, qastroezofageal reflüksü olan insanlar üçün xoşagəlməz hisslərin qarşısını almaq üçün qidalanma zamanı maye qəbulunu məhdudlaşdırmaq daha faydalı ola bilər. Digər tərəfdən, müsbət məqamlar da var. Bir çox xəstələr mənə bildiriblər ki, səhər içilən bir stəkan su onların özlərini daha gümrah hiss etmələrinə kömək edir, ümumi əhvali-ruhiyyəni yaxşılaşdırır", - deyə həkim qeyd edib.

Digər üstünlüklər arasında səhər tezdən maye qəbulunun orqanizmin nəmlənməsinə və böyrəklərin işinin yaxşılaşmasına kömək etməsi, həmçinin toksinlərin xaric olunmasını sürətləndirə bilməsi qeyd olunur.

"Beləliklə, acqarına içilən bir stəkan su həzm proseslərini yaxşılaşdırmaq üçün universal vasitə deyil, lakin əhvali-ruhiyyəyə müsbət təsir göstərən xoş səhər vərdişinə çevrilə bilər. Öz bədəninizi dinləmək və onun tələblərinə uyğun hərəkət etmək vacibdir", - deyə Useyeva yekunlaşdırıb.