Ukrayna XİN rəhbərinin müavininin çağırışı müzakirələrə səbəb olub: Kiyev İrəvana hansı mesajları verir?

Ukrayna Xarici İşlər Nazirliyi ölkə parlamentinin deputatlarını 24 aprel ərəfəsində erməni icması tərəfindən təşkil olunan anım tədbirlərində iştirakdan çəkinməyə və ən başlıcası, 1915-ci il hadisələrini ictimai açıqlamalarda “soyqırım” adlandırmamağa çağırdı.

Ali Radanın Ukrayna-Ermənistan Dostluq Qrupunun sədr müavini və hakim “Xalqın Xidmətçisi” Partiyasının üzvü Darya Volodina Xarici İşlər nazirinin müavini Vasil Bodnarın imzaladığı rəsmi məktubun surətini özünün “Facebook” səhifəsində yerləşdirib.

“Ölkəmizin bu məsələyə yanaşması dəyişməzdir. Ukrayna “erməni soyqırımı”nı tanımır”.
Bu açıqlama Ukrayna erməniləri tərəfindən tənqid edilib.

“Ukrayna erməniləri üçün 1915-ci il hadisələri və Qolodomor ümumi bir faciədir və bu cinayətlərin tanınmaması üçün edilən hər bir çağırışı bunun davamı olaraq qəbul edirik”, - deyə seperatçılara yaxınlığı ilə seçilən Donetsk vilayətinin Ukrayna erməniləri birliyinin yaydığı açıqlamada deyilir.

Ermənistan parlamentinin Xarici Əlaqələr Daimi Komitəsinin üzvü, Çiçəklənən Ermənistan fraksiyasının katibi, Ermənistan Respublikasının Ukraynadakı keçmiş səfiri Andranik Manukyanın müşaviri Arman Abovyan Ukrayna Xarici İşlər nazirinin müavini Bodnarın bəyanatının guya onun üçün təəccüblü olmadığını qeyd edib.

“Çox açıq və aydındır. Mən uzun illər Ukraynada işləmişəm və bilirəm ki, orada ciddi balans problemi məsələsi var. Bodnar bir daha Ukraynanın prioritetlərini nümayiş etdirdi. Bu, mənim üçün təəccüblü deyil, Ukraynadakı siyasi həyatdan xəbərdar olmaqla belə bir şey gözlənilən idi”, - deyə keçmiş diplomat Abovyan bildirib.

O qeyd edib ki, Türkiyə və Azərbaycan geosiyasi təsir amili olduqca güclüdür.
İrəvan Mətbuat Klubunun prezidenti və Şərq Tərəfdaşlığı Vətəndaş Cəmiyyəti Forumunun keçmiş Milli Koordinatoru Boris Navasardyan Ukrayna XİN rəhbərinin müavininin bəyanatını kiçiltmək taktikasına keçib: “Xarici İşlər nazirinin müavini statusu bu bəyanatı ciddi bir siyasi demarş hesab etməyimiz üçün layiqli səviyyə deyil.

Ancaq Ukraynanın rəsmi səviyyədə Türkiyə və Azərbaycanla daha yaxın münasibətlərə sahib olması bizim üçün yenilik deyil. Bakının və ya Ankaranın belə bir istək verdiyi və ya bəzi daxili kanallar vasitəsilə çağırışı istisna edilmir. Biz də bilirik ki, Bakı 1915-ci il hadisələri ilə bağlı heç də Ankaradan geri qalmayan siyasət yürüdür. Bu müraciətlər və ya çağırışlar nəticəsində çox güman ki, çox da səs-küylü hesab etmədiyim bu açıqlama verilib.

Bu açıqlamanı epidemiyanın yayılma təhlükəsi ilə də əlaqələndirirəm, çünki Ukraynanın müxtəlif şəhərlərində ictimai tədbirlərin keçiriləcəyinə dair bir ümid vardı. Bir neçə amil belə bir açıqlamaya səbəb ola bilər”.

Navasardyan Ermənistan-Ukrayna münasibətlərinin yüksək səviyyədə olmadığını diqqət çəkilməsinə də cavab verib, çünki bu, Qarabağla bağlı verilən bəyanata da səbəb olmuşdu.

“Ukrayna, Gürcüstan kimi, ərazi bütövlüyü məsələsində problemi olan dövlətlər olaraq Qarabağ məsələsinə xüsusi münasibət bəsləyirlər və ümumiyyətlə digər ölkələr və beynəlxalq təşkilatlarla müqayisədə seçkilərlə bağlı daha kəskin bəyanatlar verirlər. Məncə, bu yenilik deyil. Əlbətdə ki, burada qarşılıqlı faydalı münasibətlərin dərinliyi də böyük əhəmiyyət kəsb edir. Ukrayna ilə Ermənistan arasındakı münasibətlər olduqca aşağı səviyyədədir və ilk növbədə son zamanlarda daha da aktivləşən və icma tərəfindən çox səy göstərilməsinə baxmayaraq, diplomatik münasibətlər o qədər də dərin deyil. Bu, diplomatik işdən daha çox bizneslə maraqlanan keçmiş səfirin fəaliyyətsizliyi ilə də bağlıdır. Bu, əlbəttə ki, öz izini qoyur”, - deyə o bildirib.

Ukrayna, Ermənistan və digər 4 ölkə Avropa İttifaqının Şərq Tərəfdaşlığı proqramının üzvüdür. Ermənistandan fərqli olaraq Ukrayna sözdə aparıcı üçlük üzvüdür və Assosiasiya Sazişi var. Bu keyfiyyətin Aİ-nin Ermənistana münasibətinə, Ukraynanın Ermənistana münasibətinə təsir göstərə bilərmi, deyə iradlara münasibət bildirən Navasardyan belə deyib:

“Ukrayna həmişə böyük bir ölkə kimi Avropa İttifaqı üçün digər beş ölkədən daha vacib bir vasitə olduğunu dərk edərək Şərq Tərəfdaşlığında xüsusi yer tutmağa çalışıb. Ukrayna həmişə özünü fərqləndirib və Brüssel başa düşür ki, Ukraynanın Şərq Tərəfdaşlığında ayrı bir yeri var və bu ölkə ilə münasibətləri digər ölkələrlə əlaqələndirmək lazım deyil. Digər istiqamət isə Assosiasiya Sazişi olan ölkələrin - Ukrayna, Gürcüstan, Moldova olaraq ayrılmasıdır. Ukrayna həmişə bu fərqliliyin əhəmiyyətli olmasını təkid edir və bu istiqamətdə işləməyə davam edir. Başqa sözlə, dərhal özünü ayırır və üç dövləti ayrıca tutur və beləliklə Avropa İttifaqı ilə Assosiasiya Sazişini imzalayan dövlətlərin münasibətlərini təhlükəsizlik kimi sahələrə, daha sonra isə Aİ üzvlüyünə keçirməyə çalışır. Bu, Avropa İttifaqının digər üç üzv dövlətlə münasibətlərindən tamamilə fərqli bir gündəliyi nəzərdə tutur”, - deyə o qeyd edib.

Alpər Mövludoğlu
Ordu.az