“Prezidentin operativ təşəbbüsü Türk dünyasına bir mesaj oldu” – Cavanşir Feyziyev

“Dünya ölkələrinin özünü təcrid etdiyi, koronavirusla mübarizə apardığı bir vaxtda Türk Şurasına üzv ölkələrin başçılarının video-konfransının keçirilməsi olduqca mühüm hadisədir. Bunun həm siyasi, həm iqtisadi, həm də mənəvi mənası var. Xüsusilə, bizim üçün qürurvericidir ki, bu təşəbbüs Azərbaycan Respublikasının Prezidenti tərəfindən irəli sürülüb. Cənab Prezidentin bu operativ təşəbbüs həm də bütün Türk dünyasına gələcək birliklə bağlı bir mesaj oldu”.
Turkustan.info xəbər verir ki, bu fikirləri Millət vəkili Cavanşir Feyziyev AZTV-də “Hədəf” proqramının qonağı olarkən səsləndirib.
C.Feyziyev Türk ölkələrində koronavirusun fəsadlarının digər ölkələrlə müqayisədə az olmasına diqqət çəkib: “Şükrlər olsun ki, Türk ölkələrindəki vəziyyət başqa ölkələrlə müqayisədə qənaətbəxşdir. Bu da, həm ölkələrimizin cəmiyyətlərinin dövlətlə birlikdə hərəkə etməsi, digər tərəfdən də, səhiyyəmizin səviyyəsini göstərir”.