AZƏRBAYCANDA YÜKSƏK VƏZİFƏLİ ŞƏXS CƏZALANDIRILDI

Qusar rayonu Qalacıq kəndinin yaxınlığında ağacların kəsilməsi ilə bağlı Ekologiya və Təbii Sərvətlər Nazirliyinə (ETSN) daxil olan şikayət əsasında aparılan araşdırma yekunlaşıb.

Bu barədə jurnalistlərə açıqlamasında Dövlət Ekoloji Təhlükəsizlik Xidmətinin rəisi Hikmət Əlizadə bildirib.

Onun sözlərinə görə, bir müddət əvvəl sözügedən ərazidə ağac kəsintisi faktı müəyyən edilmiş və təqsirkarın aşkar olunması üçün hüquq -mühafizə orqanlarına müraciət edilmişdi: “Aparılan araşdırma zamanı məlum olub ki, Qalacıq kəndinə bitişik meşə fondunun açıq sahəsində aqrobağların salındığı sahə ilə həmsərhəd olan bələdiyyə torpağında ağaclar Qusar rayon sakini Məhəmməd Tahirov tərəfindən kəsilib. Faktla bağlı təqsirkar şəxsin məsuliyyətə cəlb edilməsi üçün tədbirlər görülür. Daxil olan məlumatla bağlı vaxtında tədbir görmədiyinə görə, Regional Ekologiya İdarəsinin rəhbərliyi barəsində intizam tənbehi tədbiri görülüb”.

Xidmət rəisi bildirib ki, eyni zamanda, sosial şəbəkədə Qalacıq kəndinin Bəbirqala adlanan sahəsində ağacların kəsiləcəyi ilə bağlı yayılan məlumat da araşdırılıb: “Sözügedən ərazidə ağac kəsintisinin olmadığı məlum olub və gələcəkdə hər hansı fəaliyyətin həyata keçiriləcəyi barədə deyilənlər təsdiqini tapmayıb.”

H.Əlizadə yaşıllıqlara həssas münasibət göstərən, belə məsələlərin işıqlandırılmasında və sona çatdırılmasında onlara kömək edən ictimai fəallara təşəkkürünü bildirib.

hemlemedia.az