Rusiyada yaşayan azərbaycanlılara xəbərdarlıq: Övladları imtahanda bu qədər bal toplamasa...

Miqrant uşaqların rus dili üzrə biliklərinin yoxlanılmasının yeni proseduru məktəbə qəbul üçün suallara 90% düzgün cavab tələb edir.

Bunu Rusiya Federasiyası Dövlət Dumasının sədri Vyaçeslav Volodin deyib.

Aprelin 1-dən etibarən miqrantların övladları rus məktəblərinə qəbul olunmaq üçün məcburi imtahan verməyə başlayıblar.

Müvafiq qanunu Rusiya prezidenti Vladimir Putin imzalayıb.

"Biz “Rosobrnadzor”un ilkin təklifi ilə razılaşmadıq. Həmin təklifə görə, rus dili imtahanından uğurla keçmək üçün miqrantların övladları 30% düzgün cavab verməli idilər. Yenidən işləndi. Bugünkü qərarda məktəbə qəbul olmaq üçün cavabların 90%-nin düzgün olması nəzərdə tutulur", - Volodin Telegram kanalında yazıb.

Dövlət Dumasının spikeri qeyd edib ki, rus dilində test üçün diaqnostik materiallar, o cümlədən şifahi hissə təhsilin hər bir mərhələsi üçün fərdi olaraq hazırlanmışdır.

“Birinci sinfə daxil olmaq üçün 10 sualdan doqquzuna düzgün cavab verməlisən; ikinci-beşinci siniflərdə 20 sualdan 18-i, altıncı-doqquzuncu siniflərdə 22 sualdan 20-si, 10-11-ci siniflərdə isə 24 sualdan 22-nə düzgün cavab verməlisən”, – Volodin izah edib.

Dövlət Dumasının sədri qeyd edib ki, bu, uşağın rus dilini bilmə səviyyəsinin obyektiv qiymətləndirilməsinə, eləcə də məktəb kurrikulumunu uğurla mənimsəməsi, uyğunlaşması və sosiallaşması imkanlarına imkan verməlidir.