Qaraciyər xərçəngindən qorunmağın qeyri-adi üsulu AÇIQLANDI

Alman Xərçəng Araşdırma Mərkəzinin və Tübingen Universitetinin alimləri müəyyən ediblər ki, 5:2 nisbətində pəhriz əsasında fasiləli aclıqla siçanlarda iltihabın və qaraciyər xərçənginin qarşısını almaq mümkün olur.
Təcrübə iki qrup siçan üzərində aparılıb. Birinci mərhələdə heyvanlar yüksək şəkər, yağ tərkibli qidalar və ya tipik “Qərb pəhrizi” ilə qidalanıblar. Birinci qrup siçanların qidaya daimi çıxışı olub. Pəhriz müdaxiləsi dövrünün sonuna yaxın heyvanlarda xroniki qaraciyər iltihabı yaranıb.
Digər qrupdakı siçanlara həftədə iki gün yemək verilməyib. Bu yemək planı 5:2 cədvəlində fasiləli aclıq adlanır.
Nəticələr göstərib ki, yağlı və şirin qidalar yeməsinə baxmayaraq, ikinci qrupdan olan heyvanlar kökəlməyiblər. Onların bədənlərində qaraciyərin zədələnməsini göstərən biomarkerlərin səviyyəsi də aşağı olub. Tədqiqatçılar yağlı qaraciyər xəstəliyinin inkişafına qarşı müqavimətin həftəlik ümumi kalori qəbulundan asılı olmadığını qeyd ediblər.
Alimlərin fikrincə, yağlı qaraciyər xəstəliyi (yağlı distrofiya, piylənmə) qaraciyər xərçənginə səbəb ola bilər. Fasiləli aclıq isə onun inkişaf riskini azaldır.