Avropa HƏMAS-ın İsrailə hücumuna necə reaksiya verdi?

Fələstinin HƏMAS terrorçu qruplaşmasının İsrail ərazisinə raket hücumlarına başlamasından bir neçə saat sonra Avropa ölkələrinin liderləri bəyanatlarla çıxış ediblər.

hemlemedia.az sözügedən çıxışların bir neçəsini təqdim edir:

"HƏMAS-ın ayrıseçkilik etmədən hücumları İsrail xalqına dərin iztirablar gətirir, gərginliyi artırır və fələstinlilərin maraqlarını pozur. İsraillə tam həmrəyliyim. MEPP ​​(Yaxın Şərq Sülh Prosesi – red.) çərçivəsində intensivləşdirilmiş səylər vasitəsilə davamlı sülh üçün çalışmaq həmişəkindən daha çox lazımdır", - Aİ diplomatiya rəhbəri Cozep Borrell bildirib.

Öz növbəsində, Avropa Komissiyasının rəhbəri Ursula fon der Leyen “Həmas terrorçularının İsrailə qarşı törətdiyi hücumu qeyd-şərtsiz” pislədiyini bildirib.

"Bu, ən iyrənc terror formasıdır. İsrailin bu cür iyrənc hücumlara qarşı özünü müdafiə etmək hüququ var".

Avropa Şurasının rəhbəri Çarlz Mişel bildirib ki, biz bu səhər İsrailə və onun xalqına qarşı törədilmiş, günahsız vətəndaşlara qarşı terror və zorakılıq törədən ayrı-seçkiliksiz hücumları qətiyyətlə pisləyirik.

"Fikirlərim bütün qurbanlarladır. Aİ bu dəhşətli anda İsrail xalqı ilə həmrəydir”, - Mişel açıqlamasında bildirib.

Böyük Britaniyanın baş naziri Rişi Sunak bildirib ki, HƏMAS-ın bu səhər hücumundan şoka düşüb.

“İsrailin özünümüdafiə üçün mütləq hüququ var. Biz İsrail hakimiyyəti ilə əlaqə saxlayırıq və İsraildəki Böyük Britaniya vətəndaşları səyahət tövsiyələrinə əməl etməlidirlər".

Fransa, Almaniya və Ukrayna da bəyanatlarla çıxış ediblər.

“Hazırda İsraildə həyata keçirilən terror aktlarını qətiyyətlə pisləyirəm", - Fransa Prezidenti Emmanuel Makron deyib.

Öz növbəsində Almaniyanın xarici işlər naziri Annalena Bärbok HƏMAS qruplaşmasını zorakılıqları artırmaqda ittiham edib.

“Mən Qəzzadan İsrailə qarşı törədilən terror aktlarını qətiyyətlə pisləyirəm. Günahsız insanlara qarşı zorakılıq və raket hücumları dərhal dayandırılmalıdır. İsrail bizim tam həmrəyliyimizə malikdir və beynəlxalq hüquq çərçivəsində özünü terrordan müdafiə etmək hüququna malikdir”, - Almaniyanın xarici işlər naziri qeyd edib.

Öz növbəsində, Ukrayna Xarici İşlər Nazirliyi bəyan edib ki, o, “İsrailə qarşı davam edən terror hücumlarını, o cümlədən Qüds və Təl-Əvivdə mülki əhaliyə raket hücumlarını qətiyyətlə pisləyir”.