Gədəbəy rayonunda 100 aztəminatlı ailəyə ərzaq yardımı edil.

Bakı, 15 aprel, AZƏRTAC

“Sağlamlığın Qorunması” İctimai Birliyinin sədri Yazgül Abdıyeva Gədəbəy rayonunda 100 aztəminatlı ailəyə ərzaq yardımı edib.

Y.Abdıyeva AZƏRTAC-a bildirib ki, koronavirus (COVID-19) pandemiyasının yayılması ilə bağlı xüsusilə regionlarda maddi imkanı aşağı olan ailələrdə ərzaqla və digər gündəlik zəruri ehtiyaclarının təminatında müəyyən problemlər olduğu nəzərə çarpır. Bu həssas dövrdə aztəminatlı ailələrə xüsusi diqqət və qayğının göstərilməsi çox vacibdir.

İctimai Birliyin sədri dövlətimizin belə kateqoriyadan olan insanları daim diqqət mərkəzində saxladığını, onların sosial rifah halının yaxşılaşdırılması üçün tədbirlər görüldüyünü diqqətə çatdırıb. O, xüsusi karantin dövründə bir çox qurumların, o cümlədən vətəndaşların da fərdi olaraq maddi imkanı zəif olan, o cümlədən yaşı 65-dən yuxarı olan tənha vətəndaşlara, aztəminatlı ailələrə ərzaq yardımı etdiklərini vurğulayıb.

Y.Abdıyeva diqqət və qayğıya ehtiyacı olan insanlara, aztəminatlı ailələrə sevinc bəxş edən belə xeyirxah təşəbbüslərin davam etdiriləcəyinə inandığını bildirib və imkanı olan vətəndaşları həmin kateqoriyadan olan şəxslərə maddi və mənəvi dəstək göstərməyə səsləyib.

© Materiallardan istifadə edərkən hiperlinklə istinad olunmalıdır