GƏNCƏ VƏ GORANBOY VETERANLARI TƏŞKİLATLANIR

Bəzi bölgələrdə şöbə sədrlərinin yarıtmaz və mənsəbpərəst fəaliyyətləri sayəsində rayon və şəhər şöbələrinin fəaliyyəti iflic edilib. AVMVİB sədri F. Rzaquliyev bu cür yarıtmazlıqları aradan qaldırmaq üçün fəal veteranlarımıza əlavə səlahiyyətlər verməklə Səlahiyyətli nümayəndələr təyin etdi. Bu təsisat qısa müddətdə özünü təsdiq etdi. Durğunluq içində olan şöbələrin rəhbərliyi dəyişdirilir və veteranlarımız arasında canlanma var. Bu proses bundan sonra da davam etdiriləcək.

Məsələ ilə bağlı AVMVİB Sədrinin təşkilati məsələlər üzrə səlahiyyətli nümayəndəsi Əşrəf Fazili ilə söhbət etdik. O, az vaxt ərzində Gəncəbasar zonasında görülmüş və görülməkdə olan işlərdən danışdı: "Milli Müstəqillik Günü ilə əlaqədar Gəncə Dövlət Universitetində geniş tərkibdə keçirilmiş tədbirdə veteranlarımız Vətənimiz uğrunda iştirak etdikləri döyüş əməliyyatları barədə etdikləri çıxışlar kollektiv arasında maraqla qarşılandı. Tədbirdə Universitetin Humanitar məsələlər üzrə prorektoru Gülsüm Fətəliyeva, Elm və İnnovasiyalar üzrə prorektoru, millət vəkili Pərvin Kərimzadə çıxış etdilər. Veteranlarımız və şəhidlərimizin qəhrəmanlıqları ilə xalqımızın fəxr etdiyini dilə gətirdilər. Tədbirdə Qarabağ uğrunda döyüşlərin iştirakçısı, Universitetin tarix-coğrafiya fakültəsinin müəllimi Bəhmən Kazımov AVMVİB adından "Milli Ordu-100" və "Müharibə veteranı" xatirə medallarıyla təltif edildi. Tədbirdə daha 12 nəfər veteranımıza xatirə medalları təqdim edildi. Belə hərbi vətənpərvərlik ruhlu tədbirlərin keçirilməsini planlaşdırmışıq. Yenicə fəaliyyətə başlamış AVMVİB Goranboy rayon şöbəsinin sədri Elmar Məmmədov da bu cür tədbirlərin keçirilməsində yaxından iştirak etməklə yanaşı, rayonda veteranların bir araya gəlməsinə çalışır".

AVMVİB Goranboy şöbəsinin sədri Elmar Məmmədov da bizimlə söhbətdə Əşrəf Fazilinin fəaliyyəti sayəsində işlərimizdə bir canlanma var. Biz də rayon məktəblərində hərbi vətənpərvərlik ruhlu tədbirlər planlaşdırırıq. Rayon rəhbərliyi də bizə dəstək olur. Çalışırıq ki, veteranlarımızın yanında olaq, onların problemlərinin həllinə yardımçı olaq.

Azər Azadzad Atəs