Rasim Məmmədov üç media qurumunu məhkəməyə VERDİ

“Baku Steel Company” nin rəhbəri Rasim Məmmədov yenidən mətbuatın üzərinə hücuma keçib.

hemlemedia.az saytı Unikal.org-un məlumatına istinadən yayımladı.
Unikal.org-un məlumatına görə, iyunun 11-də "Reaksiya" TV “Baku Steel Company”nin rəhbəri Rasim Məmmədov tərəfindən xüsusi ittiham qaydasında Yasamal Rayon Məhkəməsinə verilmişdi. Həmin vaxt məhkəmə əsaslar olmadığı üçün işi icrata götürməkdən imtina etmişdi. R. Məmmədov bu dəfə isə başqa yola əl atıb. O, "Reaksiya" TV-ni indi də mülki qaydada Səbael Rayon Məhkəməsinə verib. R. Məmmədov "Reaksiya" TV-yə 100 min manat məbləğində iddia qaldırıb.
Maraqlısı odur ki, bu R. Məmmədovun mətbuata qarşı ilk hücumu deyil. Belə ki, o buna qədər "Yeni Müsavat" qəzetinə və "Azpolitika.info" saytına qarşı da iddia qaldıraraq təzminat tələb edib. Bir ilə yaxındır ki, məhkəmə çəkişməsi hələ də davam edir.
Bir sözlə, o Azərbaycanda fəaliyyət göstərən müstəqil mediadan əl çəkmir. R. Məmmədov tənqidə dözümsüzlük nümayiş etdirdiyi üçün müstəqil medianı məhkəmə vasitəsi ilə susdurmaq istəyir. Əgər o, mətbuat üçün əlçatan olsaydı hazırki situasiya yaranmaz və fərqli mənzərənin şahidi olardıq. Amma görünən odur ki, R. Məmmədov ölkədə yaradılan azad media mühitinə qarşı öz çirkin əməllərindən əl çəkmir.
Bununla bağlı media eksperti Ələsgər Məmmədli Unikal.org-a açıqlamasında bildirib ki, mətbuat azadlığı qorunmalıdır və mətbuat ictimai nəzarət funksiyasını həyata keçirir. Ə. Məmmədli qeyd edib ki, əsassız olaraq jurnalistlərin üzərinə hücuma keçmək və onların məhkəməyə verilıməsi yolverilməzdir.
Ə. Məmmədli hesab edir ki, belə hallarla bağlı əsas vəzifə məhkəmələrin üzərinə düşür və bu məhkəmələr ədalətli hökmlər çıxarmalıdır. Ekspertin sözlərinə görə, jurnalist qanunla müəyyən edilmiş hüquqlarından istifadə etməli, lazımi məlumatı əldə edə bilməlidir. Onun sözlərinə görə, jurnalist istədiyi informasiyanı ala bilmədikdə şişirtmələrə də yol verə bilər: "Bu Avropa Konvensiyasında da nəzərdə tutulub. Media üçün həmin məlumat gizli saxlanıldığı təqdirdə bu hallardan istifadə edilə bilər."
Elvin Rüstəmov
ATESH,AZ