Həbsdə olan tanınmış MMA döyüşçüsü azadlığa çıxıb

Xuliqanlıqda ittiham olunan MMA və Qrapplinq Federasiyasının qarışıq döyüş növləri üzrə tanınmış idmançı Vüqar Kərəmov azadlığa buraxılıb.

Cəza müddəti başa çatan Vüqar Kərəmov saxlandığı İstintaq Təcridxanasından sərbəst buraxılıb. Onunla birgə ittiham olunan Ruslan Əfəndiyev və tələbələri - Xəzər Rüstəmov və Rüfət Əsədov bir neçə gün qabaq azadlığa çıxıblar.

Qeyd edək ki, hadisə ötən il Səbail rayonu ərazisində baş verib.

İttihama görə, təqsirləndirilən idmançılar "Rizin" Döyüş Federasiyasının paytaxtda təşkil etdiyi turnirlə bağlı toplaşarkən mübahisə yaranıb. Mübahisə zamanı idmançı Həsən Əzizov döyülüb.

Cinayət işinin istintaqı Bakı Şəhər Baş Polis İdarəsi tərəfindən aparılıb. Bu il yanvarın 31-də Ruslan Əfəndiyev və onun tələbələri - Xəzər Rüstəmov, Vüqar Kərəmov və Rüfət Əsədov barələrində həbs qətimkan tədbiri seçilib. Tofiq Musayev və Mehman Məmmədovun barələrində istintaq dövrü müddəti üçün həbslə bağlı olmayan qətimkan tədbiri seçilib. Daha sonra təqsirləndirilən şəxslərə Cinayət Məcəlləsinin 221.2.1-ci (bir qrup şəxs tərəfindən və ya təkrarən xuliqanlıq törədildikdə) maddəsi ilə yekun ittiham irəli sürülüb.

İstintaqın sonunda iş üzrə təqsirləndirilən Mehman Məmmədovun barəsindəki cinayət işinə bəraətverici əsaslarla xitam verilib.

Səbail Rayon Məhkəməsinin hökmü ilə Xəzər Rüstəmov, Rüfət Əsədov, Ruslan Əfəndiyev və Vüqar Kərəmovun hər biri 6 ay müddətinə azadlıqdan məhrum edilib. Tofiq Musayev isə 1500 manat məbləğində cərimə olunub.