Türkiyədən Pakistana SİYASİ DƏSTƏK - Fidan zəng etdi, XİN bəyanat yaydı

Türkiyənin xarici işlər naziri Hakan Fidan Pakistanın baş nazirinin müavini İshaq Dara telefonla zəng edərək Hindistanın ölkə ərazisinə endirdiyi raket və artilleriya zərbələrindən sonra regional təhlükəsizlik vəziyyətinin pisləşməsindən ciddi narahatlığını bildirib.

bu barədə "Samaa" TV məlumat yayıb.

Türkiyə Hindistanın Pakistana qarşı əsassız təcavüzünü qətiyyətlə pisləyib, Cənubi Asiyada artan gərginlik fonunda tam həmrəylik nümayiş etdirib və sakitliyə çağırıb.

Türkiyə xarici işlər naziri hökumətinin Pakistanın suverenliyi və ərazi bütövlüyünə qəti dəstəyini çatdırıb.

“Biz Pakistanda vəziyyətin gərginləşməsi və günahsız insanların faciəli şəkildə həlak olmasından dərin narahatıq”, - deyə Fidan bildirib.

İki lider inkişaf edən vəziyyəti müzakirə edib və yaxın günlərdə sıx əlaqə saxlamaq barədə razılığa gəliblər. Onlar regional sabitliyin vacibliyini vurğulayıblar və gərginliyin daha da artmasının qarşısını almaq üçün bütün tərəfləri təmkinli olmağa çağırıblar.

Türkiyənin Pakistandakı səfiri baş nazirin müavini Dar ilə təcili görüş keçirib. Görüş zamanı səfir Hindistanın zərbələrini pisləyib və mülki vətəndaşların həlak olması ilə bağlı başsağlığı verib. O, Türkiyənin Pakistana dəstəyini bir daha təsdiqləyib və Pakistanın hava məkanının pozulması və insan tələfatına beynəlxalq diqqətin lazım olduğunu vurğulayıb.

Pakistan Ankaranın dəstək mesajını alqışlayıb, sülhə sadiq qaldığını, lakin istənilən təcavüzə cavab vermək hüququnu özündə saxladığını bir daha bəyan edib.

Türkiyə Xarici İşlər Nazirliyi də rəsmi bəyanat yayaraq həm Hindistan, həm də Pakistanı gərginliyi azaltmağa və diplomatik dialoqa çağırıb.

“Türkiyə hər iki ölkəni təmkinlə hərəkət etməyə və regionda sülhə üstünlük verməyə çağırır”, - deyə bəyanatda bildirilir.